LABORAL KUTXARI POSIZIO ZORDUNAK ERREKLAMATZEAGATIKO KOMISIOA (ZENBAKI GORRIAK) KOBRATZEARI UZTERA BEHARTU DIO AUZITEGI GORENAK

Auzitegi Gorenak ez du Laboral Kutxak aurkeztutako errekurtsoa onartu, eta beraz, irmoa da posizio zordunak (zenbaki gorriak) erreklamatzeagatiko komisioa baliogabetzat jotzen duen epaia.

Gure kontu korrontea zenbaki gorritan geratzen zenean (faktura bat kobratu nahian saldo nahikorik ez genuenean alegia), automatikoki 30 euroko komisioa sortzen zen, berandutze-interesez gain.

EKA/ACUV-en beste arrakassta-kasu bat bide batez, 2016an demanda kolektibo bat aurkeztu baitzuen, komisioaren deuseztasuna eskatuz, gehiegizkoa zela ulertuta. Kontua da, bezeroari ez zitzaiola inolako zerbitzurik ematen eta ez zituela gardentasun-irizpide eta bankuaren jardunbide-egokiak betetzen. Hala, Auzitegi Gorenak deuseztzat jo du aipatu komisioa, zerbitzu gehigarririk eskaini ez izanaren argudio bera baliatuta.

Laboral Kutxak, beraz, hura aplikatzeari utzi eta bere kontratu guztietatik ezabatu behar du. Era berean, bidegabeki kobratutakoa itzultzera derrigortu dio sententziak ere bai. Ildo horretatik, kaltea jasan duten gure bazkideak animatzen ditugu erreklamazioa bidera dezaten.

EKA/ACUV-ek sustatutako beste epaiekin bat dator finantza-entitateen gehiengoari eragiten dion sententzia hau, eta horregatik da hain zuzen funtsezkoa kobratu zaien kontsumitzaileei ezagutaraztea, zeinek dagozkien kopuruak itzultzea exijitu ahalko dioten bankuari.