‘REFIX’ EDARIAK ELIKAGAIEN EZAUGARRI NUTRIZIONAL ETA OSASUNGARRIETAKO PUBLIZITATEKO EUROPAKO ARAUDIA HAUSTEN DU

Asociación de Usuarios de la Comunicaciónek aurkeztutako erreklamazioa onartuta, Autocontroleko Epaimahaiak ebatzi du ‘Refix’ edariaren publizitateak iragartzen dituen ezaugarri osasungarriak ez daudela elikagaien adierazpen nutrizional eta osasungarriei buruzko Europako 1924/2006 Araudian onartuta eta, hortaz, legez kontrako publizitatea dela.

Siete Cuarenta Natural, S.L. enpresak merkaturatzen duen ‘Refix’ produktuaren publizitatearen arabera, osagai nagusia itsas ura duen edari hidratatzaile eta indargarria da eta “giza gorputzaren indarberritzerako beharrezko elementu guztiak dauzka”. https://refixyourself.com weborriak ‘Refix’ edariaren osagai eta ezaugarri guztiak eta osasunerako omen dauzkan ahalmen onuragarriak xehetasun osoz azaltzen dituen txosten bat erakusten du: https://refixyourself.com/wp-content/uploads/2018/05/DOSSIERLOOKBOOK_ESP_WEB.pdf.

Joan den apirilarean 10ean, Asociación de Usuarios de la Comunicaciónek (AUC) Espainiako publizitate-industriaren autorregulazioko organismo independentea den Autocontrolen (https://www.autocontrol.es/) ‘Refix’en publizitatearen aurkako erreklamazio bat aurkeztu zuen publizitatearen eta lehiaren gaineko beste lege eta batzuen artean elikagaien adierazpen nutrizional eta osasungarriei buruzko Europako 1924/2006 Araudia hausten duela salatuz: https://www.boe.es/doue/2006/404/L00009-00025.pdf.

AUC-ek zioen erreklamatutako publizitateak aipatu araudiak onartutako elikagaien adierazpen osasungarrien zerrendetan hartuta eta onartuta ez dauden ‘Refix’en ezaugarri osasungarrietako adierazpenak iragartzen zituela. Zerrenda horiek 432/2012 Araudian aurkitzen dira: https://www.boe.es/doue/2012/136/L00001-00040.pdf.

AUC-ek salatutako ‘Refix’en adierazpenak honako hauek dira: “organismoa alkalinizatzen du”, “odol-garraztasuna gutxitzen laguntzen du”, “higadura fisikotik organismoa indarberritzen laguntzen du”, “zelulak hidratatzen eta eletrolitikoki kargatzen laguntzen du”, “entzima-funtzioa orekatzen laguntzen du”, “PH 7,40tan mantentzen laguntzen du” eta “birsorkuntza zelularra bultzatzen laguntzen du”.

AUC elkartearen erreklamazioak Autocontroli eskatzen zion ‘Refix’en publizitatea legez kontrakotzat jotzeko eta Siete Cuarenta Natural, S.L. enpresari publizitate horren berehalako amaiera edo zuzenketa eskatzeko. Autocontrolek erreklamazioaren izapidea onartu zuen eta enpresari eman zion horren berri. Bere buruaren defentsan, Siete Cuarenta Naturalek argudiatu zuen bere publizitatea ez dela bidegabea “aipatutako produktuak osasunerako ondorio onuragarri batzuk lortzen laguntzeko duen gaitasuna besterik ez duelako azaltzen, ez baitu lor daitezkeenik bermatzen”.

Kasua behar bezala aztertu ondoren, apirilaren 19an Autocontroleko Epaimahaiaren Lehen Sailak bere erabakia eman zuen: ‘Refix’en publizitateak 1924/2006 Europako Araudiaren 10.1 artikulua urratzen du eta harekin batera Autocontroleko Kodearen 2. araua ere bai (“Publizitateak indarreko legedia errespetatu behar du eta era berezian Konstituzioan aitortutako baloreak, eskubideak eta printzipioak”); ondorioz, iragarlea erreklamatutako publizitatea zuzen dezala premiatzen du ebazpenak: https://www.autocontrol.es/wp-content/uploads/2016/02/rest2275.pdf.

Iragarleak ez du publizitatea zuzendu; ez dago hortara behartuta Autocontroleko bazkide ez delako

Autocontrolen ‘Refix’en gaineko erabakia ezagututa, EKA/ACUV-ek edariaren weborria begiratu du eta bidegabetzat jotako adierazpenek publizitatean dirautela baieztatu du. Siete Natural Cuarenta S.L. enpresak ez dio Autocontrolen eskariari jaramon egin. Horixe jakinarazi genion Autocontroli ekainaren 14an emailez, ‘Refix’ auziari eta Autocontrolen erabakien efektuei buruz ere galdetuta. Autocontrolen erantzuna biharamunean heldu zitzaigun: bere erabakiak betetzea derrigorrezkoa da solik bere bazkideentzat eta Jardute Kode Sektorialen bidez Autocontroleko sisteman atxikitako beste entitateentzat; gainerakoentzat borondatezkoa delarik. Bere bazkideak Autocontroleko Código de Conducta Publicitaria delakoan atxikita dauden enpresak dira, eta horien artean ez dago Siete Cuarenta Natural, S.L. Hortaz, enpresa hau ez dago Autocontrolek emandako ebazpena betetzera behartuta.

Halere, Autocontrolek esan zigun ere bai bere Epaimahaiaren erabakiek “indar moral ukaezinaz” gozatzen dutela sektore osoan, “baita sisteman atxikita ez dauden enpresen artean ere”, eta ebazpen horiek prozedura judizialetan eta administratiboetan froga gisa erabil daitezkeela, eta erabiltzen direla.

Albiste hau argitaratu baino lehen, EKA/ACUV-ek kasu honi buruz duen informazioa eta dokumentazioa Eusko Jaurlaritzaren Osasun eta Kontsumo Saliari bidali dizkio gai honetan interesa agertzea egokitzat har dezakeelakoan.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude